Luk 14 | MHL | STEP | Iir oko Sabat fofa-pa Yeesus-ke wi Farisi woos mua oko koora-pa maa enowa ikiwok. Nan ikaeya baliwep akena wuap ikemik, ikoka maa mauwa-ko oneya-na opora-pa wuiyen naemik.

Luke 14

Mua oko mia arimurumep ikaeya Yeesus-ke saliwak

1 Iir oko Sabat fofa-pa Yeesus-ke wi Farisi woos mua oko koora-pa maa enowa ikiwok. Nan ikaeya baliwep akena wuap ikemik, ikoka maa mauwa-ko oneya-na opora-pa wuiyen naemik. 2 Ne mua oko mia arimurumep ikua nain pun o wameiya-pa nan ikua. 3 Ne Yeesus-ke mua nain urufap, wi sira amis mua ne wi Farisi wia nokarek, “Yiena sira kekanowa kamenap, mua napuma eliw Sabat-pa wia saliwiyen-i e weetak?” 4 Wia nokarek-na wi bauserap ikemik. Naap ikok wapeniw mua nain tiimeya sariarek. Sariareya sesekeya ikiwok. 5 Ikiweya wia maakek, “Ni muuka-ko e bulmakau-ko Sabat-pa eka irauwa-pa niar orainon-na kamenap onowen? Me aawep purupowen-i?” 6 Wi opora nain wiar kiripowa me pepek.

Mua ona wame porainok

7 Iir nain wi mua maa enowa ekapemi samapora miimowa-pa pokiyen naep onamik. Naapeya Yeesus-ke wia urufap opora fain wiek. 8 Wia maakek, “Mua oko-ke muewow maa enowa nefa fareya-na ikiwemi miimowa-pa me poka. Oko mua unumiya no nefa nomakek nain pun fareya ekapinon. 9 Ne mua onoma nain-ke ekap nefa maakinon, ‘No eeneke ekap poka. Mua fain miimowa-pa feek pokinok.’ Naap nefa maakeya no emina ururinan. Emina ururep erap murarow akena-pa pokinan. 10 Ne naapeya mua oko-ke maa enowa naep nefa fareya-na ikiwep murarow akena-pa poka. No naap oneya mua onoma nain-ke ekap nefa maakinon, ‘Yomar tetera, moram nan pokan. No epap feek poka.’ Naap nefa oninon-na wi mua unowa ekapemik nain-ke mua tetera nefa maikuan. 11 Neemi mua ona unuma wame fakerinon-na, ikoka wiar poraikuan. Ne mua ona unuma wame porainon-na, mua nain unuma wiar purupikuan.”

Mua maa enowa wia farowa

12 Aria naap ikok Yeesus mua onoma nain maakek, “No enow gelemuta-ko onap-na nena nomar, nena neepe e niamun, nena owow epaskun maamuma onaiya ikemik nain me wia fare. Wi enep oko wiimar no kiripomikuan. 13 Neemi enow gelemuta-ko onap-na mua feenap nain wia fare: mua maa marew, oram akena ikemik nain, ne mua napuma onaiya ikemik nain, mua meren samora, mua mokok opa, wi mua naap nain wia fare. 14 Wi mua naap nain no kiripomowa me pepek. Ikoka no manek akena kemelinan, moram ikoka Mua Maneka-ke wi mua kaken eliwa umep ikok iikirow epa-pa no kiripominon,” naap wia maakek.

Maa enow maneka arekin opora

(Matiu 22.1-10)

15 Aria mua oko wi wiamiya maa enem-ikok opora nain miimap Yeesus maakek, “Wi emeria mua Mua Maneka pika kemena-pa wiar ikok maa enimimik nain eliw kemelikuan.” 16 Naeya arekin opora wia iromami feenap maek, “Mua oko enow maneka onekam naep fofa wuap mua unowa opor amisa wiek. 17 Fofa nain kerereya, ona uuwow mua sesekeya ikiwep mua unowa iiriw opor amisa wiep-puak nain wia maakek, ‘Aakisa ni ekapeka. Maa iiriw opok.’ 18 Wia maakeya unowa nain miatinep i ikiwowa me pepek naemik. Oko-ke maek, ‘Yo miiwa sesenarem nain urufowa ikiwiyem. Sira eliwa, yo me ekapinen.’ 19 Oko-ke maek, ‘Yo bulmakau ten kuisow wia sesenarem nain uuwowa wia akimowa ikiwiyem. Sira eliwa, yo me ekapinen.’ 20 Ne oko-ke maek, ‘Yo emeria aawep enuma ikem. Naapeya yo ekapowa wia.’

21 Aria uuwow mua nain kirep ekapep wi maemik kakeniw naap ona saria maakek. Naap maakeya kema bagiwirap ikok kiiriw nainiw sesekak, ‘No ewur akena ikiwep, wi owow era maneka-pa ikemik nain ne era gelemutitik-pa ikemik nain, wi mua oram, napum mua, wi mokok opa ne wi meren samora nain naap wia aawep ekape.’ 22 Naeya ikiwep naap wia aawep koora-pa wia wuap saria maakek, ‘Oo saria, yo no opora nookap naap onam, ne epa papako oram ikomakek.’ 23 Ne saria-ke maakek, ‘Aa-na nainiw era mane-maneka ne manin era ookami kekanowa wia maakep emeria mua momor wia aawep ekape. Naap oneya koora efar taanuk. 24 Yo nefa maakiyem, wi mua mokomokoka wia farem nain, wi kiiriw ekapep maa me efar enimikuan, weetak akena.’” Arekin opora naap wia iromak.

Mua baliwep kema suuwap-puap Yeesus ookinok

(Matiu 10.37-38)

25 Aria teeria maneka Yeesus ookam-ikaiwkin kirep wia maakek, 26 “Mua yo efar ekapiya nain ona wiawi, onak, emeria ne muuka, wiipa, wiamun mikikira me wiinon-na, yo teeria-pa efar ikowa me pepek. Ne pun ona kookalowa me piipuinon-na yo teeria-pa me efar ikainon. 27 Ne mua ona nomokow moke me akuawep yookinon-na, yo teeria-pa me efar ikainon.

28 Maa baliwep kema suuwap onimik. No koora iinan akena kuainen naep-na, kiikir pokap koora naap nain sesa kema suuwinan, maamuma nefar pepek erak-i e weetak. 29 Oko poka muutiw iimarowap-puap koora me weeser-wuinan. Mua unowa naap urufap, nefa firekami nefa amap-niirikuan. 30 Naap nefa maikuan, ‘Mua nain koora welawowa saarik poka iimarowak.’

31 Ne owow saria oko-ke ikiwep saria oko onaiya irakekam naep o kiikir pokap baliwep akena kema suuwinon. O irakow mua tausen ten kuisow (10,000) muutiw wiar ikua, ne saria oko nain mua tausen ten erup (20,000) wiamiya ekapem-ikaiya. Naapeya o kiikir amisarep-puap, irakowa eliw nomakinon-i e weetak. 32 Pokap kema suuwinon, me pepekeya-na ona iiwua epasia-pa ikaiwkin ona teeria mua papako wia sesekinon, ikiwep wi wiamiya aakunep irakowa puukuk naep. 33 Naap akena, o mua kuisow maa unowa baliwep kema suuwap mikikira me iwomakep-na, yo teeria-pa me ikainon.”

Ifera masia marew

(Matiu 5.13, Mak 9.50)

34 “Ifer masia pun naap, maa eliwa-ke. Ifera masia dabelalep masia ikiwinon-na kamenap oniwkin masia kiiriw imenarinon? Me pepek. 35 Dabela naap nain manina-pa wuowa ne miiwa afila iwowa pun me pepek, ikoka iirarikuan. Ni ifan onaiya ikok-na opora fain baliwep akena miimeka,” naap maek.